ای تاپان بیت خدا ایچره ولادت یا علی
ای وجوددین عالم امکانه رحمت یا علی
سن ازلدن ایلمیشدون دعوت حقی قبول
سوره اخلاصه ائتمیشدون شهادت یا علی
تا رسول الله تاپیپ فیض رسالت حقدین
سن همان گون دعوتین ائتدون اجابت یا علی
محضر پیغمبریله گئچدی عومرون خوش گونی
چوخ چتین اولدی ایدن ساعتده رحلت یا علی
اولمادی بیر کس سلونیدن بوله منظوریوی
دوتموشیدی گوزلری دست جهالت یا علی
اولمادی بیر کس سنه مونس سوزون چاهه دئدون
چکمیسن تاریخ بویوندا درد غربت یا علی
سن نه بیر گون نه بیر ایل نه قرن تاریخین بویی
تاپمیوبسان درد غربتدن فراغت یا علی
اولمادی هئچ عصریده بیر همدم و مونس سنه
آچدیلار هر عرصه ده باب عداوت یا علی
سن هدایت رکنی سن افسوس دست ظلمیله
قانه غرق اولدون سینیب رکن هدایت یا علی
اولماسیدون سن صفا تاپمازدی قران مبین
سن وئروبسن دین و قرانه شرافت یا علی
ای نماز اوسته وئرن انگشترینی سائیله
روح تاپدی سنله محراب عبادت یا علی
کوفه ده یوزلر یتیمه باش چکیردون هر گئجه
سن شهید اولدون چوخالدی در د حسرت یا علی
ناطق قران سنیدون ای عدالت معدنی
تپراقا دوشدون تمام اولدی عدالت یا علی
کوفه محرابینده قانلی صبحیده اولدون شهید
یاره لندی باش سینیب رکن هدایت یا علی
ایندی اون دورت قرندن صونرا یئنه تک قالموسان
یوخدی بیر کیمسه ایده دینه حمایت یاعلی
دولدوروب ریب و ریا کفر و جفا محفلری
حقین اهلی باشلییبدور راه عزلت یا علی
مدعی لر دولدورب دونیانی یوخ مرد عمل
کور ایدوب دی گوزلری حب ریاست یاعلی
آه او گوندن نهروانین شیخلری ایتدی ستم
قرمزی قانه دونوب محراب طاعت یا علی
اوندا کی جسم شریفون دفن اولدی قبریده
سن نه بلکه قویلانیب عدل و عدالت یا علی
ایلدون جنگ و جهادیله عدالت برقرار
آرزو ایتدون نصیب اولدی شهادت یا علی
ایستورم منده یازام مدحینده نچه بیت شعر
نیلیوم یوخ الده سرمایه بضاعت یا علی
تیکمیشیخ گوز یوللارا بلکه گله مهدی بالان
ایلیه تفسیر قرانی قیامت یا علی
